संत श्री गाडगे महाराज

अमरावती येथील शेणगाव येथे गाडगे महाराजांचा जन्म झाला. त्यांचे मूळ नाव डेबूजी झिंगराजी जानोरकर होते. त्यांचे वडील व्यवसायाने परीट होते. गाडगे महाराजांचे बालपण त्यांच्या आईच्या माहेरी म्हणजेच त्यांचे आजोळगाव  मूर्तिजापूर येथील दापुरे याठिकाणी गेले. त्यांचा मामा मोठा तालेवार होता व त्याची बरीच मोठी शेतीभाती होती. गाडगेबाबांना लहानपणापासूनच शेती करायला व गाईगुरांची निगराणी राखायला मनापासून आवडत असे. १ फेब्रुवारी १९०५ रोजी त्यांनी घरादाराचा त्याग करून सन्यास स्वीकारला .अनेक ठिकाणी भ्रमण व तीर्थाटन केले. त्यांनी लोकसेवेचे व्रत स्वीकारून पूर्ण केले. लोकांच्या अडीअडचणीला धावून गेले. गरजूंना मदत करून परत कुठल्याही परतफेडीची अपेक्षा न ठेवता आपल्या वाटेने निघून जायचे .!

मिश्किल पण उपदेशात्मक संवादाने ते समोरच्या व्यक्तीच्या मनातली अंधश्रद्धा दूर करीत. सार्वजनिक स्वच्छता आणि अंधश्रद्धा निर्मूलन याविषयीची शिकवण समाजात रुजवण्यासाठी त्यांनी "आधी केले मग सांगितले" या उक्तीप्रमाणे स्वतः ते या कार्यात सक्रिय राहिले. ते हातामध्ये एक खराटा सतत बाळगत असत व ज्याही गावी जात तिथला परिसर स्वतः स्वच्छ करीत व कसलीही अपेक्षा न बाळगता तिथून निघून जात. अंगावर गोधडीवजा फाटकी तुटकी वस्त्रे आणि हातामध्ये एक फुटके गाडगे,असा त्यांचा वेष असे ;यामुळेच लोक त्यांना "गाडगेबाबा" म्हणत...त्याचप्रमाणे गोधडेबाबा ,चिंधे बाबा,लोटके बाबा याही नावांनी ते जनमानसात प्रसिद्ध होते. अंधश्रद्धा ,अज्ञान ,अनिष्ट रूढी-परंपरा याविषयीची जनजागृती ते आपल्या कीर्तनाद्वारे करीत असत. चोरी करू नका ,कर्ज काढू नका ,व्यसने करू नका ,देवाधर्माच्या नावाने मुक्या जनावरांचा बळी देऊ नका , अस्पृश्यता  पाळू नका, स्वच्छता राखा. तसेच देव दगडधोंड्यात नाही तर माणसात आहे ....या आणि अश्या अनेक उपदेशांनी ते समाज प्रबोधन करीत असत. २० डिसेंबर १९५६ रोजी अमरावती येथील वलगाव येथे त्यांचे निर्वाण झाले. अमरावती मध्ये त्यांचे स्मारक आहे