संत श्री सेना न्हावी

संत सेनाजी महाराज वारकरी संप्रदायातील एक मोठे विठ्ठल भक्त होते. संत नामदेव व संत ज्ञानेश्वर या संतांचे ते समकालीन संत होते व पांडुरंगावर त्यांची नितांत श्रद्धा होती. त्यांचा जन्म अलाहाबाद जवळील बांधवगड येथे झाला होता. ते व्यवसायाने नाभिक होते व तेथील स्थानिक राजाकडे हजामती करण्याचे काम करीत असत. नित्यनेमाने कामे करत असतानाही ते मनाने सदैव विठ्ठलचिंतनात मग्न असत. ते बहुभाषिक होते. मराठीसोबतच हिंदीमध्ये देखील त्यांच्या अभंग रचना मोठ्या प्रमाणात आढळून येतात. पंजाब धर्मियांच्या "गुरुग्रंथसाहेब" या पवित्र ग्रंथामध्ये त्यांच्या रचना आहेत तसेच संत जनाबाईसारख्या समकालीन संतांनी देखील त्यांचा उल्लेख  आपल्या अभंगामध्ये केलेला आहे. आयुष्याच्या उत्तरार्धात ते पुन्हा आपल्या जन्मभूमीकडे परतले मात्र पंढरपूरच्या पांडुरंगाचा ध्यास सतत त्यांना लागलेला असे. एके दिवशी आपल्या घरात एकादशीच्या दिवशी ते दिवसभर पांडुरंगाचे नामस्मरण करत चिंतन करीत बसले ...दुसऱ्या दिवशी श्रावण वद्य द्वादशीला त्यांची समाधी लागली व ते अनंतात विलीन झाले. हा दिवस सेना महाराजांचा 'पुण्यतिथी दिवस' म्हणून पाळला जातो व आजही त्यांचा उल्लेख मोठ्या आदराने केला जातो. बांधवगड येथे आजही संत श्री सेना महाराजांचे स्मृतीठिकाण आहे तसेच श्री क्षेत्र पंढरपूर येथे प्रदक्षिणा मार्गावर  महादेवाच्या मंदिरासमोर संत सेना न्हावी महाराज यांचे समाधी मंदिर आहे