संत श्री सावता माळी

सोलापूर जिल्ह्यातील माढा तालुक्यातील अरण या गावातील सावता माळी वारकरी संप्रदायामधील एक ज्येष्ठ व श्रेष्ठ संतकवी होते. ते विठ्ठलाचे परमभक्त होते. आपल्या मळ्यामध्ये काम करीत असताना देखील विठ्ठलनामाचा जप सतत त्यांच्या मुखी असे. जीवनातील सगळी कर्तव्ये पार पाडत असतानाही ईश्वर भक्ती निष्ठेने करता येते ही त्यांची धारणा होती आणि हीच खरी ईश्वरी सेवा ही त्यांची श्रद्धा होती. कर्तव्ये पार पाडत असता त्यात समरसून जाणे व त्यातून अलिप्त होणे या दोन्ही गोष्टींचा त्यांनी समतोल साधला होता. "कर्मे इशू भजावा" म्हणजेच आपल्या कर्तव्यातून व कर्मामधून परमेश्वर मिळवावा असे ते म्हणत. ते कधीही पंढरपूरला गेले नाहीत मात्र स्वतः देव विठोबा त्यांच्या भेटीस आला. आजही ही प्रथा कायम आहे, वर्षातून एकदा पंढरपूरहून विठ्ठलाची पालखी संत सावता महाराजांच्या भेटीस त्यांच्या अरण या गावी येते. १२९५ मध्ये आषाढ वद्य चतुर्दशीच्या दिवशी ते अनंतात विलीन झाले. त्यांना अवघे ४५ वर्षांचे आयुष्यमान लाभले. संत सावता महाराजांचे केवळ ३७ अभंग उपलब्ध आहेत. पण प्रत्येक अभंगातून त्यांनी धार्मिक प्रबोधन व भक्तीप्रसार केला